واشنگٹن: سابق امریکی صدر ڈونلڈ ٹرمپ نے کہا ہے کہ اگر میرا قتل ہوا تو امریکا ایران کو ختم کردے گا۔
عالمی خبر رساں ادارے کے مطابق ڈونلڈ ٹرمپ نے اپنے سوشل میڈیا پلیٹ فارم ٹروتھ پر ایک ویڈیو بھی شیئر کی جس میں اسرائیلی وزیراعظم کی امریکی کانگریس میں تقریر کا کلپ دکھایا گیا تھا۔
ویڈیو میں اسرائیلی وزیراعظم کو ٹرمپ کی تعریفیں اور یہ کہتے ہوئے سنا جاسکتا ہے کہ ڈونلڈ ٹرمپ پر انتخابی ریلی میں قاتلانہ حملے میں ایران ملوث ہے۔
اس ویڈیو کو شیئر کرتے ہوئے کیپشن میں سابق امریکی صدر ڈونلڈ ٹرمپ نے لکھا اگر مجھے قتل کر دیا گیا جس امکان ہمیشہ رہتا ہے، تو میں امید کرتا ہوں کہ امریکی فورسز ایران کو صفحہ ہستی سے مٹا دیں گی لیکن اگر ایسا نہ ہوا اس کا مطلب ہوگا کہ امریکی لیڈر شپ بزدل ہے۔
واضح رہے کہ حال ہی میں ایک انتخابی جلسے میں 20 سالہ نوجوان نے ڈونلڈ ٹرمپ پر گولی چلائی جس میں وہ بال بال بچ گئے جب کہ سیکیورٹی فورسز کی جوابی فائرنگ میں حملہ آور نوجوان مارا گیا۔
